ന്യൂഡൽഹി: മുതിർന്ന തിരഞ്ഞെടുപ്പ് കമ്മീഷൻ ഉദ്യോഗസ്ഥനെതിരെ രണ്ട് തിരഞ്ഞെടുപ്പ് കമ്മീഷണർമാർ നൽകിയ പരാതികളിൽ നടപടിയെടുക്കാൻ കേന്ദ്ര മന്ത്രിസഭാ സെക്രട്ടേറിയറ്റ് വിസമ്മതിച്ചതായി റിപ്പോർട്ട്. പരാതികൾ കമ്മീഷണർമാർ വ്യക്തിഗത നിലയിലാണ് നൽകിയതെന്നും അവയെ മുഴുവൻ തിരഞ്ഞെടുപ്പ് കമ്മീഷന്റെയും ഔദ്യോഗിക കത്തിടപാടായി കണക്കാക്കാനാവില്ലെന്നാണ് സെക്രട്ടേറിയറ്റ് വ്യക്തമാക്കിയത്.
വിവരാവകാശ നിയമപ്രകാരം പുറത്തുവന്ന രേഖകളിലൂടെയാണ് ഇക്കാര്യം വ്യക്തമായത്. മുതിർന്ന ഡെപ്യൂട്ടി തിരഞ്ഞെടുപ്പ് കമ്മീഷണറായ മനീഷ് ഗാർഗിന്റെ പ്രവർത്തനരീതിയെക്കുറിച്ച് തിരഞ്ഞെടുപ്പ് കമ്മീഷണർമാരായ സുഖ്ബീർ സിങ് സന്ധുവും വിവേക് ജോഷിയും ജൂലൈ 29ന് കേന്ദ്ര മന്ത്രിസഭാ സെക്രട്ടറി ടിവി സോമനാഥന് പ്രത്യേകം കത്തുകൾ അയച്ചിരുന്നു.
മുതിർന്ന ഡെപ്യൂട്ടി തിരഞ്ഞെടുപ്പ് കമ്മീഷണർമാർ, ഡെപ്യൂട്ടി തിരഞ്ഞെടുപ്പ് കമ്മീഷണർമാർ, ഡയറക്‌ടർ ജനറൽമാർ, തത്തുല്യ പദവിയിലുള്ള ഉദ്യോഗസ്ഥർ എന്നിവർക്കിടയിലെ ജോലിവിഭജനത്തിൽ മനീഷ് ഗാർഗ് മാറ്റങ്ങൾ വരുത്തിയെന്നാണ് പരാതികളിലെ പ്രധാന ആരോപണം. തിരഞ്ഞെടുപ്പ് കമ്മീഷനുമായോ ബന്ധപ്പെട്ട ഉദ്യോഗസ്ഥരുമായോ മുൻകൂർ ചർച്ച നടത്താതെയാണ് ഈ മാറ്റങ്ങൾ വരുത്തിയതെന്നും പരാതിയിൽ ചൂണ്ടിക്കാട്ടി. വിരമിച്ച നാവികസേനാ ഉദ്യോഗസ്ഥനും വിവരാവകാശ പ്രവർത്തകനുമായ ലോകേഷ് കെ ബത്ര നൽകിയ അപേക്ഷയ്ക്ക് മറുപടിയായാണ് മന്ത്രിസഭാ സെക്രട്ടേറിയറ്റ് നിലപാട് വ്യക്തമാക്കിയത്. കമ്മീഷണർമാരുടെ കത്തുകൾ ഗൗരവത്തോടെ പരിഗണിക്കേണ്ടതാണെങ്കിലും അവയെ മുഴുവൻ കമ്മീഷന്റെയും ഔദ്യോഗിക അറിയിപ്പായി കാണാനാവില്ലെന്ന് സെക്രട്ടേറിയറ്റ് കുറിപ്പിൽ വ്യക്തമാക്കി. രണ്ട് കത്തുകളും ലഭിച്ചതായി അറിയിക്കാനും അവയുടെ പകർപ്പുകൾ മുഖ്യ തിരഞ്ഞെടുപ്പ് കമ്മീഷണറുടെ പ്രിൻസിപ്പൽ പ്രൈവറ്റ് സെക്രട്ടറിക്ക് വിവരത്തിനായി കൈമാറാനും സെക്രട്ടേറിയറ്റ് നിർദേശിച്ചു. ഭാവിയിൽ മനീഷ് ഗാർഗിനെ സംബന്ധിച്ച തീരുമാനങ്ങൾ എടുക്കുമ്പോൾ പരിഗണിക്കുന്നതിനായി വിഷയം രേഖപ്പെടുത്തുകയും ചെയ്‌തു.
