டெல்லி: கர்நாடக மாநிலம் சிருங்கேரி சட்டமன்ற தொகுதியில் 2023ம் ஆண்டு நடைபெற்ற வாக்கு எண்ணிக்கையின் வீடியோவை கண்டுபிடிக்க முடியவில்லை என்று தேர்தல் ஆணையம் தெரிவித்ததற்கு உச்சநீதிமன்றம் கடும் அதிருப்தி தெரிவித்துள்ளது. அடுத்த விசாரணையின்போது உரிய ஆவணங்களையும் பதிவுகளையும் தாக்கல் செய்யாவிட்டால், தேர்தல் ஆணையத்துக்கு எதிராக நடவடிக்கை எடுக்க வேண்டியிருக்கும் என்றும் நீதிபதிகள் எச்சரித்துள்ளனர்.
தேர்தல் ஆணையத்தின் செயல்பாடுகள் குறித்து இப்போது நாடு முழுக்க போராட்டங்கள் நடந்து வருகிறது. எஸ்ஐஆர் உள்ளிட்ட விவகாரங்களில் தேர்தல் ஆணையம் ஒருமித்த முடிவின் அடிப்படையில் செயல்படவில்லை என்பதே புகாராகும். இந்த போராட்டங்கள் காரணமாக தேர்தல் ஆணையம் தொடர்பான வழக்குகள் கவனம் பெறுகிறது.
இதற்கிடையே கர்நாடக தேர்தல் தொடர்பான வழத்கை நீதிபதிகள் சஞ்சய் குமார், சஞ்சீவ் சச்தேவா ஆகியோர் அடங்கிய அமர்வு விசாரித்தது. அப்போது கர்நாடக மாநிலம் சிருங்கேரி சட்டமன்ற தொகுதியில் 2023ம் ஆண்டு நடைபெற்ற வாக்கு எண்ணிக்கை வீடியோவை கண்டுபிடிக்க முடியவில்லை என தேர்தல் ஆணையம் தரப்பில் தெரிவிக்கப்பட்டது.
இதை கேட்டவுடன் அதிருப்தி அடைந்த நீதிபதிகள், தேர்தலை நடத்தும் பொறுப்பில் உள்ள தேர்தல் ஆணையத்தால், தேர்தல் தொடர்பான முக்கிய வீடியோ தொலைத்துவிட்டோம் என எப்படி சொல்ல முடியும் என்று கேள்வி எழுப்பினர். அவர்கள் மேலும், "தேர்தல் ஆணையம் தனது வீடியோவை தொலைத்துவிட்டதாக எப்படி கூற முடியும்? தேர்தலை நடத்துவதுதான் உங்கள் முழு பொறுப்பு. அது தொடர்பான அனைத்து ஆவணம் உங்களிடம் இருக்க வேண்டும்" என்று நீதிபதிகள் கூறினர்.
